Сите вработени кои подолго време работат со договор на дело во болниците во земјава ќе добијат договори за неопределено време веднаш по изборите, а најдоцна до крајот на годинава, најави директорот на Фондот за здравство, Сашо Клековски, при денешната посета на ЈЗУ Општа болница Велес заедно со својот заменик Бранко Аџигогов како и со заменик министерот за здравство Јовица Андовски, одговарајќи на новинарско прашање.
– Прашање е колку бргу можат административно да се постигнат тие процеси зашто треба да се координираат повеќе институции, но сепак по изборите до крајот на годината имаме целосна посветеност за да добијат договори на неопределено време сите што неколку години работеле со договори на дело и со тоа да им се реши статусот – рече Клековски.
Конкурсот за вработување на 124 медицински лица и медицински парсонал во прилепската болница, лица кои неколку години беа ангажирани со договор на дело во оваа здравствена установа беше објавен на 23 јули.
Прилепската болница ќе добие 21 лекар, 49 медицински сестри, а останатите вработувања, се за медицински персонал. Паралелно прилепската болница ќе добие и 8 специјaлизанти.