Во тек се градежните работи на регионалниот пат помеѓу населените места Кадино Село и Галичани, каде се реализира асфалтирањето на овој патен правец.Реконструкцијата на овој регионален пат е инвестиција на Јавното претпријатие „Македонија пат“ во соработка со Министерството за транспорт и врски. Денеска, на увид на теренските активности беа градоначалникот на општина Прилеп, Илија Јованоски, претседателот на Општинскиот Совет, Миле Талевски и директорот на ЈП „Македонија пат“, Беким Мемеди. Во населените места Кадино село и Галичани, претходните два месеци, реконструирани се дел од улиците, во вкупна должина од околу 900 метри.
„Регионалниот пат помеѓу овие две населени места, во должина од околу 3.5 километри
во тек е негово целосно асфалтирање. Сакам да упатам благодарност до Јавното претпријатие „Македонија пат“, затоа што излегува во пресрет и ја гради оваа делница, а сето тоа во интерес на граѓаните од овие населени места“, рече градоначалникот Јованоски, додавајќи дека од следната недела продолжуваат градежните активности и во останатите населени места во општина Прилеп.
Директорот на „Македонија пат“, Беким Мемеди потенцираше дека успешната
соработка на претпријатието со локалната самоуправа и Министерството за
транспорт и врски, доведе до вистинска градежна офанзива во целиот регион.
„ Патот е во должина од 3.5 км и ширина од 3.30 метри, инвестиција во вредност од 10.000.000 денари. Ја продолжуваме одлична соработка со градоначалникот на општина Прилеп, така да активностите не застануваат тука. Во тек се градежни активности и на патниот правец Витолиште – Штавица, во мариовскиот дел. Наредната недела започнува асфалтирањето на овој патен правец, којшто е од огромен интерес
за прилепчани и за жителите од овој регион“, изјави директорот Мемеди.