Во ликовната галерија на ЦК “Марко Цепенков“ во Прилеп, утре 11 ти септември од 20 часот ќе биде отворена изложба на фотографии насловена како „Инстант семејства – мултипликација на љубовта“ од прилепчанецот Роберт Јанкулоски .
Пред посетителите ќе бидат претставени 15 фотографии со големина 80×100 изработени на архивска, памучна хартија, на кои е пренесено авторовото видување за семејството и љубовта, за начинот на виртуелно живеење во денешно време.
Роберт Јанкулоски е роден во Прилеп, 1969 година. Дипломирал на факултетот за Драмски уметности во Скопје на катедрата по камера во 1996. Магистрирал во 2011 на Универзитет за аудиовизуелни уметности – ЕСРА Париз-Скопје-Њујорк во Скопје. Основач е на Македонскиот центар за фотографија, 2000 година. Реализирал 36 самостојни изложби и учествувал на голем број групни изложби насекаде во светот.
