Фестивалот на народни инструменти и песни „Пеце Атанасовски“ е на прагот од новото 48 мо издание. Организаторите најавуваат богата програма, многу учесници, гости од соседна Србија, семинар на народни инструменти и песни, симпозиум. По двегодишни модифицирани изданија поради пандемијата, на општо задоволство ќе одекнуваат гајдите, зурлите, кавалите, тапаните, ќе се разлеат изворните песни во Прилеп и на Рудина кај Долнени.
Фестивалот е на први и на втори јули (в петок и в сабота). Но, од 28 јуни почнува семинарот за изучување на народните инструменти и песни. Ќе има 10-тина изучувачи на кои ќе им предаваат еминентни етномузиколози. На први во Прилеп и на 2 во Рудина кај Долнени вкупно околу 300 изведувачи од цела Македонија ќе се претстават со изворниот мелос. Ќе бидат прогласени најдобрите, а на најдобриот гајдаџија ќе му биде доделена „Гајдата на Пеце“ што ја обезбедува општина Долнени.
В петок, на први јули, од 11 часот во ликовниот салон од ЦК „Марко Цепенков“ ќе се одржи Симпозиумот и ќе биде промовирано најновото издание на зборникот на трудови „Фолклорот во минатото и денес“.