Иницијативниот одбор за поттикнување на развојот на областа Мариово најавува голем мирен протест и патна блокада за петок, 15ти март. Блокадата на надвозникот на патот Прилеп – Витолиште, кај Ново Лагово е најавена да трае од 8 до 10 часот, а мирниот протест ќе се одржи пред зградата на општина Прилеп од 10 до 12 часот истиот ден.
Како што се наведува во соопштението причина за протестот е потценувачкиот и понижувачки однос на институциите и крајното запоставување на развојот на областа Мариово, како и беспримерната експлоатација на природните ресурси со крајно запоставена патна мрежа и запоставување на воодоснабдувањето и неорганизираниот пристап кон овој проблем, запоставување на проблемите на сточарите, земјоделците, пчеларите и другите индивидуалци и стопански субјекти, запоставување на здравството и несодветни решенија со нецелисходно трошење буџетски средства.
Ова е трет протест кој се организира од Иницијативниот одбор за поттикнување на развојот на областа Мариово, а втора блокада со цел да се предизвика поголемо внимание кај институциите и јавноста за решавање на проблемите со кои се соочени жителите на Мариово, како и луѓето кои потекнуваат од овој регион.
