На вториот ден од карневалската традиција во Прилеп, на платото кај Градската саат кула денеска беше претставен адетот по кој што се одликува градот поврзан со големиот православен празник „Велики Поклади – Прочка“. Здружението Преродба на автентичен начин го долови значењето на обичајот „Амкање“ кој што единствено за Прочка се изведува традиционално во Прилеп. Варено јајце со лушпа, се врзува за конец и сукало. Јајцето виси на конецот, а оној што ќе го земе со устата, ќе го лапне, се верува дека ќе го следи среќа целата година.
Лилјана Ѓорѓиеска од Здружението „Преродба“ вели дека „Амкањето“ е радост за децата:
„ Најстариот член од семејството, на сукало врзува јајце и го врви на устињата на дечињата, па она што ќе го касне јајцето, ќе биде среќно во целата година. Меѓутоа, симболиката, онаа нашата традициска е пред запостувањето, пред „запокладувањето“ во последната вечер од „Прочка“ да се каснува бело јајце со што всушност и запостуваме и ја затвораме устата, односно постиме се’ до Велигден кога пак се омрсуваме со јајце, меѓутоа со црвено, велигденско“, вели Ѓорѓиеска.
Суштината на овој адет е поврзана со велигденскиот пост кој започнува на чист понеделник, веднаш по Прочка. Затоа во последната недела, на последното јадење, на вечерата се „запокладува“ со јајце и со сирење.
Карневалските настани продолжуваат утре, недела на самиот празник „Проштени поклади – Прочка“ кога од пладне, од 12 часот, започнува карневалското дефиле со претставување со музика и посебна кореографија на повеќе од 500 маскирани учесници, групирани во над 20 групни и поединечни маски. Гости ќе има и од: Кавадарци, Пробиштип, Мокриево, Куратица, Берово, Сопот, Струмица и од други градови.