Пелагониските одгледувачи на овци соочени со големи проблеми со кои се загрозува опстанокот на оваа сточарска гранка. Бараат итни мерки за интензивирање на откупот на јагнињата и исплата на заостанатите субвенции. Велат дека ресорното министерство треба да ја укине мерката 50/50 со која се условени при продажбата на јагнињата во време на откуп пред велигден. Од друга страна кланирачите нудат пониски откупни цени од реалната производна цена, со што се доведува во прашање нивната рентабилност. Во моментов откупната цена на јагне се движи од 210 до 220 денари за кгр жива мера. Поради застој на откупот од 3 месеци, одгледувачите се условени од кланиците да продаваат по ниски, неисплатливи цени:
Имаме проблем со откупот на јагнето, цената е енормно ниска. Бевме во преговори со министерот за некои работи да се решат, до денес немаме добиено одговори за тоа. Проблем имаме со мерката 50 % да се носи во кланица. Цената ни ја одредуваат тие, ние бараме под итно мерката 50/50 да се укини, за да можеме барем да го предадеме јагнето оти е во поодмината фаза и прерастено. Пресметката беше на средбата со министерот дека производната цена на јагнето годинава е 270 денари од кгр. Бараме да се доплати разликата меѓу откупната и производната цена.Ова ќе биде незапаметена година за сточарите во Пелагонија, јагнето да остане дома, вели Боби Бошевски, сточар со фарма од 600 грла овци од битолско Подино.
Сточарите имаат проблем и со ненавремената исплата субвенциите. Велат дека без овие средства и без сигурен откуп на јагнето, не можат да опстанат.
– Беше договорено после лозарите во февруари, да се исплатат сточарите. Сточарите не се исплатени. На пример мерката за повраток на овчари не е исплатена, и земаме субвенции за 2022 година. Јас сум 25 години со фирма, плаќам месечно 160 денари за придонеси. Јагниња не предадени, субвенции нема, со што ние овие трошоци да ги подмириме, прашува Бошевски .
Сточарите велат дека околу 70 отсто од јагнињата во Пелагонија се во поодмината возраст, со килажа од над 28 кгр што во моментов не е атрактивна за откуп наменет за велигденските празници.
Откупувачите сега не условуваат цената да биде помала, можеби ќе ни го земат јагнето на 200 денари за кгр, а можеби и ќе ни го вратат од кланица. Со тие јагниња нема што да се прави, освен да се остават за приплод. Кој може да остава за приплод, кој не, тоа е чиста загуба, Кирил Стефаноски, село Трап, битолско.
Но, иако период за откуп на јагне со помала килажа наменето исклучиво за велигденските празници е при крај сеуште има време за надомест на штетата, доколку се преземат интервентни мерки од ресорното министерство и Владата. Додека пак, велат сточарите, и македонското јагне над 28 кгр се бара во повеќе земји како што е Албанија, Косово, Бугарија и Хрватска, но за тоа е потребен организиран пласман за откуп од страна на државата, што било најавено од ресорното министерство но, никако да се реализира.
Укината ни е субвенцијата за женско јагне, а откупот е уништен. Сега од кланица се враќаат јагниња. Јас сум откупувач, сега кланиците не ги сакаат големите јагниња. Каде да ги носиме ние сега како сточари? На приватно не не оставаат да продаваме. Плата не земаме, субвенции немаме, јагнињата ни стојат во шталите, од што ние да живееме? Месото во касапниците е 700 до 800 денари за кгр, а 200 денари ни ги земаат јагнињата, вели Марјанчо Стојаноски, од Новоселани прилепско.
Пелагониските сточари, одгледувачи на овци, бараат итна средба со ресорниот министер и со премиерот за решавање на проблемите кои годинава се наталожени поради ниските откупни цени и неисплатените субвенции. Сточниот фонд, велат се намалува, а интерес кај младите речиси и нема за одржување на овој сектор. Како и за повеќе други земјоделски сектори, годинава, ќе биде пресудна за иднината на македонското овчарство доколку државата не преземе соодветни мерки за опстој и поттикнување на развојот.
Известува: Филип Димкоски