Во организација на Институтот за старословенска култура во Прилеп се одржува дводневен научен собир „Материјализација на мислата: идеолошките концепти зад културното наследство“ на кој учествуваат научници од Македонија, Србија, Бугарија, Грција и САД. Целта е да се анализираат подлабоките значења на културното наследство, за кои современиот човек не е свесен или остануваат недоволно јасни под напластувањата на вековите, односно за „разбурањето на подлабоките значења ви градбите, уметничките и пишаните дела, народните преданија и легенди, е битен предулсов за разбирањето на денешницата и на современата култура,“ како што посочи д-р Александар Василески, директор на Институот за старословенска култура.
– Проучувањата на делата кои го градат комплексниот мозаик на културното наследство, од перспективата на повеќе научни дисциплини, а особено сублимирањето на добиените научни резултати ни даваат можност да добиеме заокружена слика за контекстот во кој настанале, за нивното суштествено значење, но и за безвременските пораки кои се вткаени во нив. Разбирањето на ваквите пораки ќе ни помогне подобро да ја разбереме нашата сегашност и подобро да се разбереме себеси“ – рече д-р Василески.
Примарната цел за одржување на меѓународниот научен собир е да се промовираат суштинските вредности на материјалното и нематеријалното културно наследство кои, пред сѐ, се втемелени во културната историја и традиција. Преку презентации и дискусии научниот собир ќе се придонесе во разбирањето и значењето кое го имале и го имаат идеолошките парадигми и религиските сфаќања на општествено и индивидуално ниво, како и за нивното влијание врз архитектурата, уметноста, обичаите, јазикот, фолклорните и литературните творби. Овој научен собир ќе даде значаен придонес кон интернационалната афирмација на културното наследство, како значаен ресурс на
колективна меморија и културната размена.