Во соработка со основните училишта од општината ЈОУ ГБ „Борка Талески“- Прилеп, реализираше новогодишен конкурс на тема „Краснопис“. Натпреварот се одржа во просториите на библиотеката во Прилеп. Учество зедоа 40 основци во две категории: од трето до петто и од шесто до деветто одделение.
– Современиот начин на живот полека ги оддвојува децата од она што значи мирис на книгата и размислување за време на процесот на пишување. Наша заложба е новите генерации да ја почитуваат книгата, да ја негуваат почитта кон авторите во светот и убавата мисла, кои што ни ја разубавуваат мислата и во исто време можеме да патуваме во светот и низ сите меритијани со книгата. Тоа беше повод за прв пат по долго време на прагот од новата година да организираме еден ваков натпревар. Сакаме да го вратиме времето на убавото пишување кога се учеше и практикуваше краснопис како посебен предмет во основните училишта. вели Моника Талеска вд директор на Градската библиотека „Борка Талески“- Прилеп.
Убавото пишување на ракописното писмо на македонскиот литературен јазик е многу важно за учениците, зашто преку убавиот ракопис се гледа убавината на јазикот, рече наставникот Љупчо Петрески.
Комисијата беше составена од претставник од ЈОУ ГБ „Борка Талески“- Прилеп и од наставници по македонски јазик и одделенска настава.
На најдобрите им беа доделени пригодни награди, а на сите учесници пофалници.