Демант на УЖ на ОК на ВМРО-ДПМНЕ Прилеп на дел од Колумната „ВО ПРИЛЕП НЕ Е ПРОБЛЕМ, А СЕ’ Е ПРОБЛЕМ!(17)“

УЖ на ОК на ВМРО-ДПМНЕ Прилеп упати Демант на дел од 17 тата Колумна на новинарот Зоран Момироски. Како професионален медиум кој ги почитува принципите на објективност, одговорност и точност Демантот го објавуваме во целост:

Во колумната ВО ПРИЛЕП НЕ Е ПРОБЛЕМ, А СЕ’ Е ПРОБЛЕМ!(17) објавена на 9. 12.2022 во рубриката Актуелно на порталот на Радио Пела, од новинарот Зоран Момироски УЖ на ОК на ВМРО-ДПМНЕ – Прилеп упатува Демант на дел од колумната поврзан со  „Шеснаесет  дена женски активизам  од ООН и ОБСЕ за заштита на правата на жените“.

Новинарот во тој дел од колумната тврди дека „во Прилеп оваа кампања ја прифатиле и ја организирале само Полицискиот синдикат и Форумот на жени на СДСМ од Прилеп.“

Со цел да демантираме дел од колумната и да ја информираме јавноста УЖ на ОК на ВМРО-ДПМНЕ – Прилеп информира дека УЖ на ОК на ВМРО-ДПМНЕ – Прилеп се вклучи во оваа кампања уште од првиот ден и ја поддржа  борбата против насилство врз жените со делење флаери со содржина во која се повикува на запирање на насилството врз жените. Исто така, во интерес на оваа кампања, како и во интерес на заштита на жената од секаков вид насилство и родово базирано насилство, УЖ на ОК на ВМРО-ДПМНЕ – Прилеп обезбеди бесплатна психолошка поддршка од страна на лиценциран психолог, за жени и девојчиња кои се жртви на сите форми на насилство.

Притоа, беше потенцирано дека ова може да се спроведе само преку охрабрувачки однесувања насочени кон жените и нивната улога во општеството, како и соочување и излегување на крај со родовите стереотипи и предрасуди.

Превенцијата подразбира и учење на децата од најрана возраст за здрави родови улоги и еднаквост меѓу мажите и жените, како и стекнување вештини за ненасилно решавање на конфликтот.

За ваша информација, УЖ на ОК на ВМРО-ДПМНЕ – Прилеп се вклучува во одбележување на секој настан и активизам во интерес на жената и нејзините права, како и во интерес на заштита и унапредување на здравјето на жените. Како пример, ќе кажеме дека во изминатиов период, со активности од страна на УЖ на ОК на ВМРО-ДПМНЕ – Прилеп беа одбележани:  Октомври како месец посветен на подигање на свеста за ракот на дојка;  Светскиот ден на дијабетесот; Светскиот ден за предвремено родени бебиња и многу други.

ВМРО ДПМНЕ како партија се залага за заштита не секоја една жена, како и за вклучување на жената во општествено-политичкиот живот. Потенцираме дека жената е, исто така, многу често цел на жестоки новинарски напади, но ние како партија цврсто стоиме зад секоја од нив и ги охрабруваме да  не се чувствуваат немоќни и да се спротивстават на секаков вид насилство, вклучувајќи и напади од ваков тип.

Ние, како Унија на жени на ВМРО-ДПМНЕ, апелираме секоја жена да го даде својот придонес кој јакнење на женските капацитети за проактивно учество во јавниот и политичкиот живот бидејќи силна жена значи силно општество, стои во Демантот на Билјана Кузманоска, претседател на УЖ на ОК на ВМРО ДПМНЕ Прилеп.