Патот до главниот град на државата Скопје, е најголемиот проблем на Македонски Брод. Изградбата на патот од Поречието до Скопје и после децении останува рак рана за оваа Општина. А, важноста за ваквото инфраструктурно поврзување би значили економско заживување на овој регион, стопирање на миграцијата и повторно населување на дел од селата. Сега, за да се стигне од Македонски Брод до Скопје, потребни се неколку часа, односно возење околу 200 км, а доколку се доизгради дел од патот , таа должина ќе се намали на само 70-тина километри.
„ Најголем проблем е што дел од патот поминува низ Националниот резерват „Јасен“ што е можеби главната причина што досега ниту една Влада во Македонија не се сака целосно да го реши овој проблем, туку само делумно. На некој начин поради патот закочена е и изградбата на поголем број викенд населеби околу езерото Козјак. Моментално по овој пат може да се поминува, но само во определени термини во текот на денот, а голем дел од патот е премногу тесен и опасен.“ вели градоначалник на Македонски Брод, Жарко Ристески.
Токму низ резерватот „Јасен“ минува патот Скопје – Македонски Брод, кој буквално го сече комплексот. Но, доколку некогаш биде пуштен за сообраќај, од Скопје до Брод ќе се стигнува за час и половина наместо како сега да се кружи половина Македонија, преку Кичево за да се стигне до Македонски Брод.
„Владата на Република Македонија нема осет и се уште не сме влезени ниту во програма за изработка и реализација на тој пат. Ние како локална самоуправа не отстапуваме, ја продолжуваме таа битка, се вмрежуваме со здруженијата на поречани и заедно со тие здруженија вршиме директен притисок врз властите. Едно чисто, еколошко подрачје ќе го отвориме кон милионската метропола така да населението ќе може своите производи, сега нели битката е за здрава храна, здрав живот, ќе може да ги пласираме на пазарите во Скопје“, вели Ристески.
Инаку, поречани во повеќе наврати дури и протестираа за изградбата на овој пат, но засега немаат решение.