Филип Николоски познат на прилепската публика заради прекрасниот глас и нескротливиот животен ентузијазам, минатата година влезе посериозно во светот на музиката и балгодарение на неговиот хит „Само на добро нека е“ сега е познат ширум Македонија.
Песната со музика на Рубин Димкоски, а по текст на Душко Темелкоски, често можете да ја слушнете на македонските радио-станици. Посебно впечатливо беше гостувањето на Николоски, на јубилејниот концерт на групата „Меморија“ по повод нивното четиридецениско постоење. Следеше и наградата „Златна бубамара на популарноста“ која групата му ја посвети на Филип.
Годинава, групата „Меморија“ и Филип Николоски се закитија со признание на манифестацијата ABILITY AWARDS 2025. Церемонијата на доделувањето и настапот беше пренесуван од Македонската радио телевизија. Фронтменот на групата, Петар Ѓорѓиевски, истакна дека и оваа награда групата му ја посветува на Филип, затоа што тој е дел од срцата на сите нас.
Деновиве актуелен е и краткиот документарен дилм „Нотите на животот“ посветен на нашиот сограѓанин Филип Николоски, во кој зборува и тој, но и неговите професорки од СОУ „Кузман Јосифовски Питу“, Цеца Видова Трајческа и Весна Миланоска како и специјалниот едукатор и рехабилитатор Гордана Стојкоска.
– Ми беше ученик, ама јас од него научив дека треба да ми е срам да се жалам за некои ситни мали смешни препреки, кога на светов има луѓе кои се соочуваат со многу сериозни и страшни предизвици-вели во доокументарецот, професорката Весна Миланоска.
Сценариото на Гордана Стојкоска, камерата и монтажата се на Петар Јошески и Душко Илиески.
Радио Пела во 2024 година го награди Филип Николоски со признанието „13 величествени“.
Погледнете го целиот документарен филм.