Мирен протест во Прилеп против промена на уставното име

Македонското патриотско здружение Пере Тошев со седиште во Прилеп, вечерва одржа мирен протест. Според иницијаторите на собирот основната причина е несогласувањето со Законот за јазици, текот на преговорите со јужниот сосед и промена на уставното име, а основната цел е зачувување на унитарноста на Република Македонија. Организаторите на протестот бараат слобода за патриотите и уставобранителите. На овој мирен собир, кој се одржа пред камената бина на Плоштадот Александрија во Прилеп се обратија на присутните Тодор Петров од Светскиот македонски конгрес, професорката Виолета Ачкоска, Сотир Костов и Горан Стојаноски.

Како што беше истакнато на собирот, протестите организирани од патриотски здруженија ќе се селат од град во град, а се најавува голем отпор на Македонците во врска со преговорите за името на државата, можното преименување и губење на идентитетот. На вечерашниот мирен протест во Прилеп беше најавен голем собир кој ќе се одржи на 27 февруари во Скопје.