Државна поддршка во вредност од 2,5 милиони евра, за вториот инвестициски проект денеска доби компанијата „ВИК (WIK) Македонија“ во технолошко-индустриската развојна зона (ТИРЗ) Прилеп. Компанијата предвидува да се вработат нови 100 лица.
Договорот за државна помош го потпишаа вицепремиерот за економски прашања, координација со економски ресори и инвестиции Фатмир Битиќи и генералниот менаџер на компанијата, Вернер Шоеб.
„ВИК Македонија“, работи во ТИРЗ Прилеп, е германска семејна компанија основана во 50-тите години од минатиот век, произведува мали електрични уреди наменети за домаќинствата. Во 2018 година со оваа компанија беше потпишан првиот договор за државна помош. Во ТИРЗ Прилеп веќе имаат реализирано инвестиција до 10,5 милиони евра во која во моментов работат 250 лица.