Заврши првенството од Втората фудбалска лига – Исток, каде Победа го освои првото место, го доби и пехарот за пласманот во прволигашкото друштво. Но тука не е крајот за, гладната за фудбал, прилепска публика. Во самата завршница е првенството од Младинската фудбалска супер лига, во која е борбата за титулата шампион помеѓу Победа и Вардар. Победа има минимална предност на табелата со 53 бода од 21 меч, пред Вардар со 52 бода од 22 меча, така што кулминација од досегашниот тек на лигата е следното коло во кое е дербито Вардар – Победа. Во дербито под императив влегуваат младите скопјани, бидејќи мораат да победат за да имаат надежи до крајот. Прилепчаните се поспокојни бидејќи потоа имаат уште два меча, додека Вардар уште само еден. Со оглед на тоа што Победа дома има натпревар со скопски Њу старс, се очекува силна поддршка од публиката на игралиштето со вештачка трева во Прилеп. А има идеја токму овој дуел да биде на најпосетеното место, Градскиот стадион „Гоце Делчев“, се разбира пред многу публика.
Но, да причекаме прво да се одигра дербито, па потоа ќе падне одлуката за тоа каде ќе се одигра следниот меч.
Извор : www.shampion.mk