Синоќа во Прилеп, на 73 годишна возраст почина Илија Велкоски – Ѕаната ( 1949-2023). Илија Велкоски беше историчар на уметност, исклучителен професионалец, посветен на работата, но и неуморен во промоција и развој на културата во Прилеп.
Истакнат во својата област, Велкоски долги години успешно ја предводеше Националната установа „Завод и Музеј“ Прилеп, како нејзин директор, а воедно бил директор и на Центарот за култура „Марко Цепенков“ – Прилеп. Прилепчани и македонската јавност ќе го паметат како исклучителен познавач на историјата и културното наследство на Прилеп и Македонија.
Како познавач и почитувач на традициите од НОБ Илија Велкоски ја извршуваше функцијата претседател на општинската организација на Сојуз на борци-Прилеп.
Илија Велкоски Ѕаната беше погребан денеска на Градските гробишта. Во негова чест и почит утре, 11 јануари, со почеток во 11 часот, во ОО на Сојузот на борци Прилеп ќе се одржи комеморација.