„Не стој Доне, Донке“, „Те видов и се заљубив“, „Пусти мерак Ратке“, „Добро утро Прилепе мој“, „Серенада“ се само дел од песните кои низ децениите ги изведувал Октет Прилеп кој вечерва со концерт во големата сала на Центарот за култура „Марко Цепенков“ ќе одбележи триесет години работа.
Специјални гости на концертот се македонскиот победник на шоуто „Никогаш не е доцна“, пејачот Сашо Башески, професорката и пејачка Белинда Ристеска и пејачката Викторија Георгиеска.
Концертот ќе започне во 19.00 часот, а влезниците чинат 100 денари.
Октетот Прилеп работи во рамките на ЦК „Марко Цепенков“ и со години ја негува староградската песна. Досега има издадено неколку албуми.