Управата за финансиска полиција денеска врши претрес на осум локации поради сомнежи поврзани со финасиското работење на прилепската болница, информираат од Јавното обвинителство.
Основното јавно обвинителство Прилеп постапува во предистражна постапка поради сомненија за кривично дело Злоупотреба на службена положба и овластување, а поврзано со финансиското работење на болницата. Обезбедени се наредби за претрес на осум локации, а дејствијата ги презема Управата за финансиска полиција. По претресите, предистражната постапка ќе продолжи со други дејствија за обезбедување докази, соопштуваат од ОЈО Прилеп.
Минатата година новото раководството на Општата болница со проширена дејност во Прилеп изјави дека установата има наследени долгови од 193 милиони денари и блокирана сметка.Тогаш Финансиската полиција почна да го проверува финансиското работење на болницата. Според првичните информации станува збор за проверки на јавни набавки и тендери во болницата во период од 2020-та до 2024-та. Претресите се вршат со цел да се пронајдат докази во истрагата и документи поврзани со сомнежите за злоупотреби при јавни набавки.