Во организација на НУ Завод и Музеј Прилеп со интерактивна манифестација денеска во Спомен домот на Блаже Конески во Небрегово беа одбележани три јубилеи: 80 години на македонска азбука, 20 години Спомен дом Блаже Конески и јубилејот 70 години Завод и Музеј Прилеп. Манифестацијата ја пренесе идејата за реалниот лик на Конески, со емотивно запознавање со неговите детски и ученички денови, доловена низ креативни, размислувачки игри и перформанси за најзначајните достигнувања во творештвото на Конески. Учество зедоа ученици и ментори од ООУ „Блаже Конески“- Прилеп, хорот при училиштето, а присутните ги поздравија Мимоза Христоска, директорка на НУ Завод и музеј – Прилеп, Мартина Пројческа, директорка на ООУ „Блаже Конески“ – Прилеп.
„Македонскиот јазик е наш темел, наш завет и наш патоказ. Тој е живо сведоштво за нашата историја, култура и идентитет. Наша заедничка обврска е да го чуваме, негуваме и пренесуваме на идните генерации. Во духот на мислата на Конески: „Јазикот е единствената наша татковина. Сѐ додека го чуваме, ќе ја имаме и татковината“, меѓу другото посочи градоначалникот Борче Јовчески, кој присуствуваше на манифестацијата.