Утре, 19 октомври во Македонија ќе се одржат осмите по ред локални избори, се избира локална власт за следните четири години. Според ДИК, ќе бидат отворени 3480 избирачки места во 80 општини, а 1.832.412 гласачи се запишани во избирачкиот список со право на глас за избор за нов состав на совети и градоначалници.
Во Општина Прилеп ќе бидат отворени 126 избирачки места, а своето право на глас можат да го остварат 62.053 граѓани. На избирачки места, избирачкиот процес ќе го следат и спроведат 1260 членови и заменици на избирачки одбори.
За важноста на гласањето!
Гласањето на локалните избори е начин граѓаните дирекно да влијаат врз одлучување за квалитетот на живеење во својот град или рурална заедница. Преку избор на градоначалник и советници тие учествуваат во одлучувањето за чистотата на својот град, за парковските и зелените површини, за урбаниот изглед на својот град, за уредување на улиците, училиштата, за водоснабдувањето, развојот на културата, спортот и поквалитетни јавните услуги во својата општина.
Како изгледа локалната структура која се бира на изборите?
На локалните избори граѓаните бираат градоначалник, кој е одговорен за спроведување на одлуките на Советот и управува со администрацијата и буџетот на општината. Градоначалникот е извршен орган, а дополнително за извршување на надлежностите, се организира општинската администрација. На локалните избори се бира и Советот на општината, кој е т.н „законодавен“, односно претставнички орган во општината, чија големина е пропорционална релативно со бројот на жители во општината (до 5000 жители – девет советници, од 5001 до 10.000-11, од 10.000 до 20.000-15, од 20001 до 40.000-19, од 40.001 до 60.000-23, од 60.0001 до 80.000-27, од 80.0001 до 100.000-33 и над 100.000 жители во Советот има 33 советници). Според бројот на жители Прилеп бира 27 советници во Советот на Општина Прилеп.
Урбани и рурални општини
Општината е основна територијална единица на локалната самоуправа, каде граѓаните преку овие преставници одлучуваа за локални прашања. Според последната територијална поделба Македонија има 80 општини, а дополнително Градот Скопје, до дополнителен статус е составен од 10 општини. Со оваа поделба во Македонија постојат 34 урбани и 46 рурални општини.
Надлежности на општината
Надлежностите на општината опфаќаат: урбанизам, планирање на локалниот економски развој, локални патишта, јавен превоз, комунални услуги, противпожарна заштита, образование, култура, спорт, заштита на животната средина и социјална грижа.
Денеска гласаат, старите лица, болните и затворениците
Денеска во Прилеп гласаат 297 болни, 119 затвореници и 60 стари и изнемоштени лица сместени во домот за стари лица „Киро Крстески – Платник“
Граѓаните на Прилеп за преставници во локалната власт избираат меѓу 11 советнички листи и меѓу 9 кандидати за градоначалници. Од ДИК, информираат дека гласачките места, утре, ќе бидат отворени од 07 до 19 часот.