Утре, недела 19 октомври, гласачките места за Локалните избори 2025 година ќе бидат отворени од 07,оо часот, а ќе бидат затворени во 19,оо частот.
Гласањето се одвива на слободни и тајни избори
Тоа право е уставно загарантирано: гласот е еднаков, непосреден и таен; никој не смее да го условува гласачот, заплашува или да му диктира за кого да гласа. Ако некој го прави тоа – веќе стнува збор за повреда на избирачкото право која е казнива според закон.
Каква е постапката
Гласачите се идентификуваат со лична карта или пасош; ДИК утврди инструкции: проверка со биометриски уред на отпечаток од десен палец, печат на ливчето пред гласање, тајно заокружување со пенкало, а потоа секое ливче оди во своја кутија (за Скопје има повеќе ливчиња). Забранети се групно/„семејно“ гласање, фотографирање во местото на гласање и внес на оружје. Важи и правилото дека лица со документи истечени од денот на распишувањето до 19 октомври сепак можат да гласаат.
Гласачко ливче
За првиот круг се испечатија 4.613.438 гласачки ливчиња; најдолгото е околу половина метар, поради голем број кандидати/листи.
Кој ќе набљудува изборите
Мисијата на ОБСЕ/ОДИХР е распоредена со тим од експерти, долгорочни и краткорочни набљудувачи;, а прес-конференцијата со прелиминарни наоди е најавена за понеделник, 20 октомври, 15:00 во Скопје. Паралелно, Конгресот на локални и регионални власти на Советот на Европа испрати делегација што ќе покрие избирачки места низ земјата.
Каде да пријавите повреда на избирачкото право
Омбудсманот отвори бесплатна линија 0800-54321 за пријави на повреди (од 07:00 до 19:00), на денот на гласањето и низ целиот процес. Линијата е активна за информации и насоки; може да пријавите и во регионалните канцеларии.
На локалните избори се избираат градоначалници и општински совети (во Скопје и градоначалник и Совет на Град Скопје).