Се заменуваат дрвените штафни на клупите на трибинскиот дел, се чистат и преуредуваат плочките, а се планираат и други зафати за да се создаде простор кој ќе биде живо срце на културните случувања – вака започна уредувањето на амфитеатарот во Варош, кој деновиве потврди и докажа дека е одличен урбан простор за одржување манифестации, концерти и настани.
Месецот мај донесе бројни концерти, манифестации и настани кои ја потврдија љубовта на варошани и прилепчани кон културата. А, летово, амфитеатарот е планиран да биде повторно сцена исполнет со музика, уметност и забава.
Сепак, убаво е кога се уредува, обновува, се одржува. Но, најважно во оваа приказна е да се чува и да се почитува трудот на оние кои работат за убав изглед на овој простор, а граѓаните да придонесуваат кон просторното одржување на амфитеатарот за да не се претвори во неуреден, искрешен и запуштен дел од Варош.
Велат, ако не го чуваме, ќе исчезне! Ако го негуваме, ќе продолжи да живее и да раскажува приказни за генерациите што доаѓаат. На нас е, што ќе направиме!