Во тешка сообраќајна несреќа што се случила на новиот експресен пат Прилеп – Градско, во близина на клучката за Кавадарци, животот го загубиле две лица, а едно лице е тешко повредено, информираат од Брзата помош во Кавадарци и Територијалната противпожарна единица кои интервенирале на местото на настанот.
Во изјава за МИА докторот Антоан Паракеов, раководител на Итната медицинска помош во Кавадарци, посочил дека директниот судир се случил меѓу две патнички возила. Во едното возило загинале маж и жена, додека во другото возило 39-годишен маж од Прилеп бил тешко повреден и во критична состојба пренесен во Општата болница во Кавадарци.
Денеска во 13:30 часот во ОВР Кавадарци, било пријавено дека на експресниот пат Градско-Прилеп, после исклучокот за Кавадарци, се случила сообраќајна несреќа помеѓу патничко возило „шкода октавија“ со прилепски регистарски ознаки, управувано од Ж.Р.(51) од Прилеп и патничко возило „фолксваген голф“ со прилепски регистарски ознаки, управувано од Т.М.(39) од Прилеп. Во несреќата на местото починале возачот на патничкото возило „шкода“ и 42-годишната Б.Б. од Прилеп, сопатник во возилото, а смрт констатирал лекар од екипа на Итна медицинска помош Кавадарци -информираа од СВР Велес.
Засега нема дополнителни информации за состојбата на повредениот ниту за причините за несреќата.
Очевидци кои се нашле во близина велат дека екипите на Итната медицинска помош и пожарникарите пристигнале многу брзо на местото на несреќата. Пожарникарите го извлекле тешко повредениот од едно од возилата, по што веднаш бил пренесен на болничко лекување.
Извор/фото МИА