Автор на муралот е наставникот Влатко Николоски, кој ова уметничко дел го работел повеќе од еден месец (35 дена), нештедејќи се себеси кон разубавување на ѕидот и покрај високите летни температури. Муралот е висок 15 метри, широк 11 метри и преставува импозантна слика што ја слави македонската писменост и култура.
На врвот на композицијата достоинствено е претставен патронот, Климент Охридски како симбол на просветителството, мудроста и знаењето, со вечната вредност на книга во неговата рака, опкружен со убавините на неговиот творечки простор, манастирот Св.Наум Охридски, деца/ученици кои читаат и букви од кирилицата што симболично „оживуваат“ излегувајќи од отворените книги, Охридското Езеро, препознатливата охридска архитектура, македонското знаме и прилепскиот Саат, сето спој на просветителството, културното наследство и љубовта кон татковината во едно моќно уметничко дело.
На наставникот Влатко Николоски, ова му е втора уметничка донација. Првата е скулптура „Капка солза“, посветено на децата со посебни образовни потреби, поставена во дворот на ООУ Климент Охридски. Со овие дела и со својата креативност, знаење и посветеност тој само покажува и потврдува дека учителската мисија не завршува во училницата, туку продолжува и преку уметноста што воспитува, инспирира и остава трајни вредности.
“Денес со голема гордост и радост го закруживме еден од најголемите проекти во нашето училиште! Благодарение на исклучителниот талент, посветеност и големото срце на нашиот наставник Влатко Николоски надворешниот ѕид на нашето училиште доби ново, непроценливо ремек-дело кое ќе го разубавува нашиот простор и ќе инспирира уште многу идни генерации. Уметноста има моќ да го промени просторот, но кога е создадена со љубов на самиот влез и лице на училиштето, таа го менува срцето на целата заедница“ напиша на својот ФБ профил директорот на ООУ Климент Охридски – Прилеп, Ахил Јаков, кој упати јавно благодарност до Влатко за неговиот несебичен труд, визијата “и, за сите убави приказни што ги преточува во бои за нашето училиште“ напиша тој .
Ова е уште еден пример дека секој училишен простор може да стане место кое мотивира, едуцира и буди чувство на гордост кај учениците. Овој мурал не е само украс на фасадата. Тој е и отворена лекција по историја, писменост, култура и идентитет, потсетник дека знаењето е темелот врз кој се гради иднината, а училиштето е местото каде што таа приказна започнува.