Со положување на свежо цвеќе и поклонение пред споменикот во кругот на касарната „Мирче Ацев“, изграден во чест на загинатите десет прилепски бранители денеска попладнево од 18 часот ќе започне одбележувањето на 22-та годишнината од трагичниот настан кај месноста „Карпалак“, каде во конфликтот 2001 година, животот го загубија десетте припадници на безбедносните сили на Р.Македонија, од Прилеп: Саше Китаноски, Нане Наумоски, Бранко Секулоски, Марко Деспотоски, Ердован Шабаноски, Љубе Грјуоски, Дарко Вељаноси, Веби Рушидоски, Горан Миноски и Пеце Секулоски.
По повод одбележувањето на 22-на години од трагичниот настан кај месноста Карпалак, доцна попладнево од 19 часот ќе биде положено свежо цвеќе и пред споменикот во село Лениште на кој се испишани имињата на десетте загинати резервисти кои загинаа на 8-ми август во конфликтот, 2001-та година.
Утре, на 8 август, делегации ќе се упатат на месноста Карпалак на патот Скопје-Тетово (тргнувањето е од 6 часот пред стара општина), а ќе бидат посетени вечните почивалишта на загинатите бранители на прилепските градски гробишта и во населените места. Во 10 часот ќе се одржи панихида во црквата „Света Петка“ во населбата Точила. Во 13 часот е централното одбележување пред споменикот „Карпалак“ во центарот на Прилеп.
