Започна реконструкцијата на крстосницата од Булевар „Гоце Делчев“ и улица „Кузман Јосифовски Питу“ кај ЦК Марко Цепенков. Според најавите на местото од сегашното семафорно сообраќајно решение ќе се гради кружен тек. Ваквото идејно решение беше најавено минатата година во јули кога градоначалникот Борче Јовчески информираше дека општината има обезбедено 5 милиони денари, а градежните активности ќе започнат за еден месец.
Но, стартот на реализацијата на проектот се пролонгира во постапката за избор на градежна фирма – изведувач. Првиот тендер во 2023 та пропадна бидејќи понудите биле повисоки од предвидената сума, а на вториот тендер за најдобра понуда беше избрана онаа од Изофас Прилеп. Договорот за изведба на градежните работи Општината го потпиша во ноември 2023 та во висина од 4 милиони 583 илјади 859 денари без ДДВ. Проектот треба да заврши до мај оваа година.
