Голем пожар вчера попладне ја зафати имотната површина на семејство во прилепското село Канатларци, при што целосно изгореа помошни простории и вредна земјоделска механизација. Според полицијата, материјалната штета е проценета на околу 5 милиони денари.
Настанот се случил на 29 август 2025 година околу 13:20 часот,каде избувнал пожар во помошни простории – летна кујна, шталa и гаражи – лоцирани во дворно место на куќа, сопственост на 44-годишен со иницијали С.К. од селото Канатларци. Пожарникарите пожарот го гаснале цели два часа и го целосно го изгаснале во 15:35 часот.
Од МВР информираат дека објектите целосно изгореле
Од огнот биле уништени помошните објекти, 500 до 600 балиња тутун, два моторцикли („Хамачи“ и „Шинерај“), повеќе апарати за домаќинство, мебел и разни кујнски предмети. Освен тоа, во пепел завршиле и мотор „Титаник“, електрична машина за нижење тутун „Тобако“, тракторска опрема, како и патничко возило „Цитроен Берлинго“.
Трагедијата е уште поголема со оглед дека изгореле и дополнителни 300-400 бали тутун, околу 2.000 метри најлон за садење бостан и цел систем за наводнување од 4.000 метри. Огнот не поштедил ниту три трактора – еден „Џондир“ и два „Тафе“, од кои едниот е целосно изгорен, а другиот делумно оштетен.
Пожарот направил пустош, а материјалната штета е проценета на околу 5.000.000 денари.
Од Министерството за внатрешни работи информираат дека увид на местото извршиле вешто лице и екипа на ОКТУПА, а причините за избувнувањето на огнената стихија дополнително ќе се утврдуваат.