Денеска на пладне во фоајето на НУЦК „Марко Цепенков“ во Прилеп се одржа промоција на книгите „Бакнежи од небото“ и „Градина полна латици“ на авторот Иван Антоновски.
Со оваа предновогодишна литературна дружба на која присуствуваа голем број дечиња и нивни родители, Центарот ги заокружува активностите на својата литературно-издавачка дејност за 2025 година.
М-р Иван Антоновски е асистент на Катедрата за македонска книжевност и култура при Филолошкиот факултет „Блаже Конески“ – Скопје, каде, помеѓу другите предмети, држи вежби по предметот Книжевност за деца. Покрај академската дејност, тој е поет, писател, есеист, книжевен критичар и преведувач.
Домаќин на настанот и модератор беше Александар Еленин, а промоцијата ја збогати учеството на актерот Александар Тодески и ученици кои читаа извадоци од книгите.