„Многу важно е да се дозволи на дијаспората да гласа, затоа што ова се луѓе кои што во Македонија носат над една милијарда евра годишно во дознаки, што значи дека ја поддржуваат македонската економија ги поддржуваат своите сограѓани коишто живеат тука, дел од нивните семејства, пријатели, отвараат сопствени бизниси, а имаме голема дијаспора која што има македонски пасош и живее во странство. Не е фер неостварување на уставното право и да им се дозволи да гласаат исклучиво физички, што значи да патуваат по пет или по 10 000 километри за да го остварат своето право на глас и тоа два пати. Еднаш да се регистрираат, а вториот пат да го остварат своето право на глас, рече Андоновски и објасни дека системот за електронско гласање треба да подготви.
„Ние имаме систем за дигитален идентитет. Тоа е порталот uslugi.gov.mk на којшто сите граѓани се регистрираат со свои лични податоци. Еднаш верификуваме дека се тие со нивна лична карта или со нивни пасош. Така што веќе ги знаеме податоците за граѓаните. Не е никаков проблем да се доразвие системот во соработка со Државната изборна комисија за да се постигне условот и да се овозможи правото на граѓаните да го остварат своето избирачко право и да гласаат, рече Андоновски, нагласувајќи дека не е фер иселениците кои имааат македонски пасоши да не го остваруваат правото на глас.
Две држави во Европската Унија веќе го имплементираат целосно системот за онлајн гласање, а според Андоновски четири држави во Европската унија тестираат, пилотираат решенија. „Имаме доволно време за три години со напредокот на дигитализацијата, со нашата работа да тестираме вакви можности за да го овозможиме ова право за нашата обврска. Имаме добра патека, имаме добри чекори. Светската банка минатата година во индексот за дигитализација не вброи во групата во категоријата А. Имаме раст од 22 позиции, што значи дека сме во групата на развиени, дигитално развиени држави,“ вели Андоновски.