Утринава, на 79 годишна возраст почина Тачко Локвенец, прилепскиот долгогодишен новинар на „Нова Македонија“, Радио Прилеп, Народен глас, а повеќе години го издаваше сопствениот весник „Порта“.
Локвенец беше хроничар на Прилеп, дописник од градот за низа македонски, печатени и електронски медиуми, човек кој што новинарството го работеше со неизмерна љубов, со почит кон професијата, кон слободното изразување.
Тачко секогаш имаше отворен „бележник“ за случувањата во прилепската чаршија, за пулсирањето на градот, за новите „ветришта“ но, со голема почит и присет кон старите времиња, зашто како што велеше и самиот – новинарите се тие, кои што се должни да го остават печатот во времето низ своите вести, репортажи, интервјуа….
Тачко Локвенец беше редовен член на ДНУ Прилеп, писател, автор и коавтор на повеќе книги, „Љубовни легенди од Прилепската чаршија“, „Судница лудница“, „Дабница“, „Ние сме тука“,„60 години од почетокот до денес“ – монографија за ПИ Витаминка.
За својата професионална работа Локвенец е повеќе пати наградуван.