Потврдено од Основниот Суд Прилеп и Основното Јавно обвинителство – осумничени се 32 лица за финансиска злоупотреба во прилепската болница.
Основното јавно обвинителство Прилеп денеска донесе Наредба за спроведување истражна постапка против 32 лица за злоупотреба во прилепската болница, 16 физички и 7 правни лица, додека уште девет други лица се осомничени за дела кои се гонат во скратена постапка за прекршување на прописите за јавни набавки во ЈЗУ Општа болница „Борка Талески“ – Прилеп.
Основното јавно обвинителство Прилеп до судијата на претходна постапка доставил предлог за определување мерка притвор за 6 осомничени, за 7 забрана за учество во постапка за јавни набавки, додека за останатите 19 физички лица се предложени мерки на претпазливост, потврди претседателката на прилепскиот Основен суд, Јасмина Шишковска. Од шесте лица, четворица се од болницата, дел од поранешното раководство, а две лица се надворешни. Четворицатa од шесте осомничени – мажи притворот ќе го издржуваат во Затворот во Битола, а две жени, притворот ќе го издржуваат во затворот во Шутка.
Како што соопштија од ЈОРСМ, тие се осомничени за кривични дела – Злоупотреба на постапката за јавен повик, доделување на договор за јавна набавка или јавно-приватно партнерство од член 275-в, како и Проневера во службата од член 354 од Кривичниот законик.
-Со пријавата се опфатени и дејствија на несовесно работење, злоупотреба на службена положба и овластување, фалсификување или уништување деловни книги и други кривични дела за дел од осомничените, кои обвинителството исто така ги испитува, велат оттаму.
Според Обвинителството, постои основано сомнение дека осомничените, како соизвршители, учествувале во дејствија со кои свесно ги повредувале прописите за јавни набавки во ЈЗУ Општа Болница со проширена дејност Прилеп со намера за себе или за друг да остварат значителна имотна корист, односно да предизвикаат значителна имотна штета на болницата, што е поткрепено и со наоди од извештај на Државниот завод за ревизија.
-Осомничените, меѓу кои поранешната директорка, раководители и други вработени на болницата, но и управители на осомничени правни лица, преку постапки за јавни набавки за сервис на моторни возила, чистење на работните простории, сервис на водоводна мрежа, молерофарбарски услуги, физичко обезбедување, реконструкција на инфективното одделение, односно преку неизвршување на договорните обврски и незаконски промени на налози за исплата, предизвикале вкупна штета на буџетот на болницата „Борка Талески“ од 42.726.978 денари, стои во соопштението од Обвинителството.
Управата за финасиската полиција пред шест месеци почна да ја „чешла“ состојбата во Прилепската болница.
Директорот на болницата Кире Јоноски откако стапна на функцијата во неколку наврати изјави дека евидентирал голем број на неправилности, а установата ја наследил со долг од над 3 милиони евра. Тој обвини дека се трошело пари на скапи телефони ајфони, мобилни броеви кои не биле никаде евидентирани. Се плаќало кеш за косење трева без договор и платен данок. Од касата на болницата се плаќало дури и за родендени, истакна тој на прес конференција.