Денеска и утре, недела, во ООУ Добре Јованоски се одржува вториот меморијален меѓународен турнир во пинг-понг Илија Карески-Каре, Прилеп 2023, во организација на ПК клубот Младост 96-Прилеп. Турнирот и годинава предизвика голем интерес кај спортистите од повеќе земји како и кај прилепската публика со над 130 учесници, од Албанија, Косово, Србија, Црна Гора, Грција, БиХ, Бугарија и Македонија. Се игра на 10 маси во повеќе категории: најмали се пионерките и пионерите до 12 и 15 години, потоа младинките и младинците до 19, па сениорките и сениорите за кои има награден фонд од по 400 евра. Ветераните се во три групи – од 40 до 49, 50 до 64 и над 65 години. 
Спортската манифестација се одржува во чест и сеќавање на Илија Карески, поранешен пинпонгар, тренер и спортски работник еден од иницијаторите за создавање на клубот Младост 96. На отворањето на турнирот присуствуваа градоначалникот Борче Јовчески и претседателот на Советот на општината Дејан Проданоски.
