МУЗИЧКИ ОМАЖ ЗА Д-Р АНАСТАС КОЦАРЕВ ВО ПАРИЗ

Париз-Бонди, 24 март 2024

Во организација на здружението „Заборавени Македонци“ на градските гробишта во париската општина Бонди, Македонците од Париз и околината, но и од други градови од Франција, како и гости од Италија и Швајцарија заедно со  градоначалникот на општината г. Стефен Ерве се поклонија на гробот на д-р Анастас Коцарев и одржаа пригодни говори за неговата научна работа и неговите заложби за независна држава Македонија на Париската мировна конференција во 1919 година. Оваа година се навршуваат 134 години од раѓањето и 93 години од смртта на светски познатиот научник од македонско потекло.

Во чест на Анастас д-р Коцарев, здружението „Заборавени Македонци„ организираше концерт во македонската православна црква „Св.Кирил и Методиј„ во Париз каде со величествени аплаузи беше пречекана и испратена музичката двојка Елена Стојчевска (флејта) и Роман Петио (гитара) кои настапија пред македонската публика. Претходно, домаќинот на единствениот македонски храм во Франција отец Даниел Стојчевски одржа литургија.

И оваа година на настанот присуствуваа потомци на семејството Коцареви (д-р Предраг Николовски од Италија) и семејството Пинел (Женевјев Брине од Париз), давајќи ѝ континуиран респект на љубовната врска која ги врзувала двајцата млади партнери Анастас Коцарев и Сесил Пинел во периодот од 1928 до 1931 година, а преку нив и негување на пријателските француско-македонски културни врски.

Д-р Предраг Николовски, потомок на д-р Анастас Коцарев, кој дојде од Италија се заблагодари на присутните  за почитта која ја негуваат за охридскиот доктор и ја потенцираше човечката димензија и вистинските вредности: „ова денес за мене е една посебна прилика што дојдов да му искажам почит на мојот предок и ви благодарам на сите вас што сте тука и што се држите до своите корени бидејќи луѓето без корен немаат вредност.„

Д-р Анастас Коцарев е роден во Охрид, на 26 март 1890 во старо и угледно охридско семејство Коцареви. Основно образование завршил во Охрид, гимназија во Солун и медицински факултет во Женева каде докторирал и останал да работи на Женевскиот универзитет како асистент, потоа како лекар и приватен доцент по онкологија на универзитетската клиника. Во 1928 година со својата вереница, парижанката Сесил Пинел се населил во Париз каде мистериозно починал на 28 март 1931 година. 

Д-р Коцарев со својата научна работа бил посветен на проблемот на дијагностицирање и лекување на ракот со примена на радиум. Ова истражување ќе го насочи на тесна соработка со познатата нобеловка Мари Склодовска-Кири која во тоа време била професор и директор на лабораторијата за радиум на Универзитетот Сорбона во Париз. Бил еден од пионерите на радиотерапијата и радиографијата и првиот научник во светот кој направил рендгенографија на фотографска плоча на пациент заболен од рак. 

Покрај неговата професионална преокупација – медицината, д-р Анастас Коцарев во текот на Првата светска војна и за време на Париската мировна конференција во 1919 година се залагал независна држава Македонија и од име на Генералниот совет на македонските друштва во Швајцарија (на кое бил и претседател) поднел барање да испрати тричлена комисија која би ги застапувала интересите на македонскиот народ, но нивното барање било одбиено од преговарачите на конференцијата.

Претседателката на здружението „Заборавени Македонци„ г-ѓа Соња Кировски нѝ изјави дека нејзиниот тим и понатаму останува посветен на ликот и делото на д-р Коцарев и секоја година организира комеморации на неговиот гроб и пригодни одбележувања на различни локации каде работел светски познатиот онколог.

Минатата година, на покана на нашето здружение во Париз за првпат престојуваше делегација од Македонија предводена од градоначалникот на Охрид г. Кирил Пецаков и беа воспоставени блиски врски меѓу двата града (Бонди и Охрид), а со свое присуство бевме удостоени и од неговата внука Соња Коцарева-Трпезановска и претседателот на Македонската академија на науките и уметностите академик Љупчо Коцарев, исто така потомок на научникот„ – нѝ потврди Соња Кировски.