Пријавени 200 деца за учество во Бадниковата поворка во Прилеп, уште има можност за пријавување

Од Пела Редакција На 26/12/2023

Оваа година Бадниковите поворки се одржуваат под мотото ,,Почувствувај радост”. Пријавени се околу 200 дечиња до сега, но на последната проба на 28.12.2023 четврток, во 18:00 часот во фоајето на НУЦК Марко Цепенков и на денот на поворката очекуваме да се приклучат повеќе дечиња, посочуваат од организаторот Здружение ,,Бадникови поворки”:

Поворката започнува од Камената бина во 10:00 часот на 06.01.2024 каде што децата ќе ги отпеат песничките ,,Вечниот Бог”, ,,Тропар на Рожденство Христово” и ,,Кондак на Рожденство Христово”. Тука дечињата ќе бидат пречекани од градоначалникот на Прилеп, г-динот Борче Јовчески кој симболично ќе ги дарува.

Пеејќи ја ,,Вечниот Бог”, поворката продолжува кон уличките низ старата чаршија, потоа се враќаме до божиќната пештера во центарот на градот и се упатуваме кон најблискиот храм, црквата Св. Кирил и Методиј (Параклис), посочуваат организаторите.

Децата во поворките ги симболизираат ангелите што го најавуваат Христовото Раѓање, а ѕвездичките што радосно ги веат над своите озарени лица се водилка кон местото каде што се раѓа Богомладенецот. Симболично прикажано, кај нас тоа е патот до божиќната пештера во која е претставен целиот настан на Христовото Раѓање – Божиќ.