Гаврил Кочоски ја пронајде паричката за Василица во Прилеп

Втора година по ред во центарот на Прилеп, на платото кај Градскиот саат се одржа манифестацијата „За Василица во Прилеп“ во организација на Општина Прилеп. Со поддршка на десетина прилепски и битолски фирми беа подарени  буречиња, греано вино и  чај. Целта е преку дружење и забава да се одбележи големиот православен празник Свети Василиј, Василица, или познат како Стара нова година, чие што чествување започнува од денеска. Програмата „Радио што се гледа“ се емитуваше во живо од платото кај Градскиот саат.

Посебна чест и задоволство ми е на овој ден да им го честитам овој христијански празник Василица на моите сограѓани. Чест ми е што по втор пат овде во центарот на Прилеп кај Градскиот саат, ја организираме оваа манифестација, рече градоначалникот Јовчески.

Гаврил Кочоски од Прилеп ја пронајде паричката во бурекот и посака среќа и здравје во годината која што следи, за себе,за семејството и за своите сограѓани. Бидејќи е невработен неговата желба е вработување во годинава што следи.

Благодарам за подароците, среќен сум што ете кај мене падна паричката. Кај нас во семејството бурекот со паричка се врти утре, традицијата се почитува секоја година, за многу години да е празникот, порача Кочоски.

Манифестацијата „За Василица во Прилеп 2023“ беше збогатена со музичка програма на која учествуваа ученици од Музичкото училиште „Ордан Михајлоски – Оцка“ и други прилепски музички групи.

Претходни 1 of 12 Следни