За претседателските избори кампањата ќе почне на 4 април, а за парламентарните на 18-ти

Од Пела Редакција На 15/02/2024

Изборната кампања за претседателските избори закажани за 24 април ќе почне на 4 април на полноќ и ќе трае до 22 април, соопшти Државната изборна комисија.

ДИК го усвои роковникот според кој што кампањата ќе почне 20 дена пред денот на изборите и не смее да трае 24 часа пред изборниот ден.

Учесниците, листите со кандидати за претседател на државата треба да ги достават до ДИК најдоцна на 19 март. Собирањето потписи за претседателските избори почнува 23 февруари и трае до 8 март.

Листите со кандидати за пратеници треба да се достават до ДИК најдоцна на 2 април.

Резултати од испитувањата на јавното мислење поврзани со учесниците во изборниот процес ќе можат да се објавуваат најдоцна на 2 мај до 24 часот.

Жрепката за утврдување на единствена листа на кандидат/и за пратеници ДИК ќе ја одржи најдоцна на 13 април.

Јавниот увид во Избирачкиот список започнува 28 февруари, а ќе трае до 18 март во 24 часот, до кога ќе можат да се поднесуваат и барањата за запишување, дополнување или бришење на податоци во Избирачкиот список.

Медиумите и електронските медиуми (интернет порталите), доколку обезбедуваат платено политичко рекламирање за учесниците во изборната кампања, се должни во рок од три дена од денот на распишување на изборите, да се регистрираат во ДИК. Радиодифузерите, печатените медиуми и електронските медиуми (интернет порталите) што нема да се регистрираат во ДИК, нема да имаат право да користат финансиски средства за платено политичко рекламирање, обезбедени од Буџетот.