Коњаниците за учество на Илинден во Крушево да се пријават

Општина Крушево и организаторот на манифестацијата Научно културни средби „Десет дена Крушевска Република“ ги повикуваат учесниците – коњаници да се пријават за овогодинешното одбележување на Илинден, најдоцна до 24 ти јули. Според повикот објавен од Општината пријавувањето е со цел на поефикасна организација и пречек  во рамките на манифестацијата.

„Во пресрет на одбележување на големиот празник Илинден и одржување на Манифестацијата научно културни средби „Десет дена Крушевска Република“ општина Крушево и Манифестацијата ги повикуваат сите заинтересирани претставници и учесници во коњаници да го пријават своето учество.

Во насока на ефикасна организација и пригоден пречек на коњаниците, здруженијата кои ќе учествуваат во коњаниците ги повикуваме да го пријават своето учество најдоцна до 24.07.2022г. на следната електронска пошта: [email protected]m“, стои во повикот од Општината и организаторот на манифестацијата Научно културни средби „Десет дена Крушевска Република“.

Традиционално, на чествувањето на најголемиот национален празник Илинден – втори август, групи коњаници од битолско, кичевско, од неколку скопски општини, гостиварско и од други места учествуваат на илинденскиот марш. Подготовките за учество во маршот како што велат учесниците траат неколку месеци претходно. Маршот на коњаниците попатно до Крушево се одбележува со свечен пречек низ градовите и селата каде поминуваат групите во комитска облека, специфична за периодот од Илинденското востание.