Откупениот тутун во целост исплатен, следува исплата на субвенциите

Во рамки на предвидениот законски рок 15 март заврши откупот на тутун од реколтата 2017. Откупот почна на 15 ноември лани. Од регистрираните 9 откупни компании, на терен откуп вршеа 8 претпријатија. На еден правен субјект не му се дозволи вршење откуп на тутун поради необезбедени финансиски средства за исплата на целокупната договорена и откупена количина тутун од тековната реколта.
Од страна на откупните тутунски претпријатија по општини и населени места пријавени се вкупно 146 откупни пунктови, при тоа откупени се вкупно 23.559.122 килограми тутун, со просечна откупна цена од 217,60 денари за килограм. Откупениот тутун е во целост исплатен.
Согласно со Програмата за финансиска поддршка во земјоделството, се воведе нов модел во три нивоа за субвенционирање на тутунот, со што е опфатен и тутунот од реколтата 2017. Односно, субвенцијата за прва класа изнесува 80 денари за килограм, и тоа е првото ниво, за втора класа 70 денари, и третото ниво е 60 денари со субвенција за трета и четврта класа, како и за дополнителните класи. Исплатата на субвенциите според најавите треба да започне од наредниот месец. Воедно наскоро се очекува да се донесе и новиот Закон за тутун и тутунски производи, со кој се укинува поднесувањето на евидентните листови.