Јанески: Заминувам од ФК Победа со високо крената глава

Емил Јанески, претседател на ФК Победа денеска со соопштение до јавноста информира дека поднесува  оставка од функцијата на која беше назначен во април годинава. Одлуката – повлекување од позицијата прв човек на Победа, според Јанески е чин на морална одговорност поради промените во раководството на локалната самоуправа:

„Почитувани мои сограѓани љубители на спортот во Прилеп, навивачи на прилепската гордост ФК Победа, чуствувам обврска да ве информирам дека од денес се откажувам од овластувањето за потпишување документи за ФК Победа АД Прилеп. Во април 2021 година ФК Победа АД Прилеп беше во исклучително тешка финансиска положба, со долг од околу 110 илјади евра и со лош фудбалски статус. ФК Победа на пет кола до крајот се соочуваше со испаѓање од втората Македонска фудбалска лига исток, па неопходно се наметнуваше потребата од помош на нашата гордост од сите оние кои му мислат добро на спортот во Прилеп, а посебно на фудбалскиот клуб Победа. Истовремено, ФК Победа беше надвор од фудбалскиот прилепски храм стадионот “Гоце Делчев” и своите натпревари ги одигруваше или на стадионот лоциран до Могилата на Непобедените или на стадионите во соседните градови.
Од тие причини градоначалникот на општина Прилеп д-р. Илија Јованоски  свика координација со актуелни фудбалски работници од општинскиот фудбалски сојуз и познати фудбалски имиња од нашата општина. Така формираното координативно тело донесе одлука за прв човек на Победа да бидам поставен јас, а Гешоски Благоја за спортски директор на фудбалскиот клуб. Во периодот додека јас бев овластен потписник на документите на фудбалскиот клуб Победа, нашиот миленик Победа најпрво обезбеди опстанок во втората Македонска фудбалска лига исток, врзувајќи три победи по ред. Најпрво беше совладан директниот конкурент за опстанок Плачковица во Радовиш, потоа Росоман и накрајот Осогово во Кочани со што ФК Победа и формално оствари опстанок во лигата. Во меѓувреме долгот на фудбалскиот клуб значително го намаливме,  а Победа се врати во својот дом, храмот на фудбалот, градскиот стадион Гоце Делчев во Прилеп. Во новата сезона стартувавме со големи амбиции и во овој момент фудбалскиот клуб Победа е на второ место на табелата, со еден бод заостанување од лидерот Саса од Македонска каменица по одиграни седум кола од втората фудбалска лига исток. За цел овој период работев искрено, посветено и со срце за ФК Победа без никаков финансиски надомест и недозволив никакво мешање на политиката во спортот, зошто само така спортските клубови во нашиот град можат да имаат успех. Мегутоа, промените се составен дел од животот. ФК Победа иако формално правно е акционерско друштво, таа во голем дел зависи од локалната самоуправа особено на финансиски план. Иако е обезбедена финансиска конструкција значително подобра во споредба со минатите години, сепак таа е недоволна без подршка на општина Прилеп. Со оглед на тоа што јас бев поставен за прв човек на Победа на иницијатива на градоначалникот Илија Јованоски,  а во меѓувреме се случија промени во раководството на локалната самоуправа чувствувам морална одговорност да се отповикам од прв човек на ФК Победа.
Шансата е голема. Победа има силен состав и не смее да си дозволи оваа година да не влезе во првата Македонска фудбалска лига, онаму каде што и е местото. Со надеж дека тоа ќе се случи, со огромна љубов ќе продолжам да бидам навивач на ФК Победа. Им се заблагодарувам на моите соработници во фудбалскиот клуб и им посакувам многу среќа во претстојниот дел од сезоната,“

стои во соопштението за јавност од Емил Јанески, досегашен овластен потписник и прв човек на ФК Победа, инаку актуелен директор на ЈКП Водовод и Канализација Прилеп.